05
09.2016

感恩丨德望校風嚴謹樸素 愛心師長助兩女順利成長

親子育兒(學習)  

時光飛逝, 三年前, 我呢位新手媽媽第一次帶 Keicy 返幼稚園, 依依不捨, 剩係識捉實佢隻手仔唔放, 一切記憶猶新.

眨吓眼, Keicy 已經幼稚園畢業, 九月開始, 就開開心心大踏步跨過校門, 入讀小一.

Good Hope_5

其實 Keicy 能夠順利完成幼稚園階段, 真係非常感恩!

Good Hope_4

因為 Keicy 有段時間鬧脾氣, 更試過企喺校門外唔肯上堂, 當時吳嘉美校長好有耐性咁拖著 Keicy 隻手, 遊學校一周, 循循善誘, 鼓勵佢上堂, 跟住 Keicy 就好快乖乖哋入課室.

Good Hope_50

喺一般人眼中, 呢件係小事, 但對我呢位德望舊生嚟講, 係一件大事.

因為親身見證自己母校嘅師長, 令自己囡囡重新愛上課室, 愛上學習, 改變佢嘅一生!

`

Good Hope_3

日前要返學校參加家長同小朋友第一次會議, 好開心可以見到笑容親切、和藹可親嘅 Sister Pauline (校長兼校監阮嫣玲修女), 佢一見到 Keicy 就講: “Hello Keicy!”

全校上上下下咁多個學生, 佢都記得小朋友個名, 認真犀利!

Sister Pauline 平易近人嘅個性, 不斷增加我對母校嘅歸屬感!

`

從細節中 向學生灌輸正確價值觀

Good Hope_34

上到小學, 各方面都執得好正, 例如皮鞋唔可以漆皮, 唔可以令面, 要着暗啞色、冇花紋嘅黑色皮鞋.

Good Hope_15

今年開始, 全校統一用同一款書包, 而德望嘅書包係同名牌 crossover, 所以喺護脊、護肩、承托力等都非常出色, 仲好經濟實惠, 每個只要200零蚊!

一般市面售買嘅書包好貴, 由每個一千至三千幾蚊不等, 所以我覺得校方呢個安排好好, 學生之間唔會「鬥書包靚」, 大家樸素啲, 冇比拚, 少咗物質主義……

Good Hope_41

連襪仔嘅設計都好有心思, 有晒 logo, 易分左右腳.

全套校服好統一, 唔止靚, 更係力求進步嘅好例子!

 

另 外, 文具方面, 無論係筆、間尺、抑或筆袋, 都要簡樸為主, 太多卡通圖案嗰啲, 全部都要係留喺屋企用, 返學校用啲物品, 唔可以太 eye catching、太多公仔、太 fancy, 令學生專心學習, 唔會出現「嘩! 你把間尺好靚呀! 可唔可以借嚟用吓?」, 或者上堂嗰陣分散注意力, 偷望隔離位同學啲文具靚唔靚等.

 

培養閱讀風氣

校方為咗令同學識自動自覺睇書, 特設閱讀時間.

學生要帶一本書返學校, 同大家一齊坐定定, 好安靜咁睇書.

 

從課外活動學習均持之以恆 完善人格

Good Hope_65

學校有好多課外活動選擇, 包括手工、英語戲劇、數學、各國歌曲頌唱、烹飪、摺紙、聖經研習、合唱團等, 而且主張家長同小朋友一齊商量, 因為已經大個囡喇, 要問吓佢想學咩, 然後填志願揀想學乜嘢, 學校會再分配.

Good Hope_37

而分配準則, 係老師認真嘅篩選, 睇吓適合參加邊樣.

Keicy 日前都做咗篩選, 當佢知道自己適合參加多種課外活動, 笑得好開心!

 

校長強調, 參加課外活動時, 要盡力做好, 持之以恆.

因為 Miss Leung 同 Sister Pauline 昔日都有代表學校出外比賽.

校長更表示, 一個團隊, 係一齊出席活動, 一齊去訓練, 所以每次都要準時出席, 如果少咗任何一個, 都唔成隊, 所以要一齊設定一個努力嘅目標, 亦即係話, 我哋Hopers 讀興趣班要好專心、好留心, 要花時間培養、堅持.

校方更明文規定, 唔畀中途退出, 揀咗, 就要完成一整年嘅學習.

 

呢番說話, 令我諗起我細個嗰陣, 亦都係透過參與課外活動, 學到好多嘢.

眼見現今好多小朋友學好多嘢, 但係有時會半途而廢, 或者樣樣學少少, 冇一樣精.

所以我都認同校方嘅做法 - 揀返一至兩樣小朋友鍾意、有興趣嘅去栽培, 好過「仙女散花」咁.

 

正係呢個「盡力做好, 持之以恆」嘅精神, Hopers 先喺各大學界比賽中表現優異, 勇奪多個獎項, 例如喺 2015-2016年度獲得:

Good Hope_25

全港小學校際劍擊比賽 女子佩劍組亞軍及女子乙組團體優異獎

`

Good Hope_28

全港學界精英羽毛球比賽(小學組) 女子組亞軍及女子雙打亞軍

九龍北區小學校際乒乓球比賽 甲組殿軍及乙組冠軍

`

Good Hope_30

九龍北區小學校際游泳比賽 女甲團體亞軍及女乙團體冠軍

`

Good Hope_31

香港學校舞蹈節

小學高年級組現代舞(群舞)甲級獎

第44屆全港公開舞蹈比賽(青年組)銅獎

小學低年級組現代舞(群舞)乙級獎

小學低年級組中國舞(群舞)甲級獎

`

Good Hope_23

第 67 屆香港校際朗誦節 獲得多個獎項

`

Good Hope_10

有獎攞當然開心, 但其實參加課外活動最重要嘅目的, 係得到滋養一生嘅良好嗜好, 例如音樂.

德望學校有好多音樂活動, 連樂團都係一條龍, 好多 Hopers 都係由小學學到中學, 就算升讀大學, 都會繼續返嚟學, 可能有家長會話:「嘩! 玩音樂咁花時間, 會唔會分心, 上唔到大學㗎?」

家長可以放心, 喺德望學校, 參加樂團嘅學生, 接近 100% 可以升讀大學, 多數成員更由小學開始好鍾意玩音樂, 一直到中學, 甚至大學.

Good Hope_36

每次喺學校三五成群咁去玩音樂, 練習樂器, 係成長時期嘅美好回憶, 期間更被音樂陶冶性情, 唔會咁易學壞, 一舉幾得!

 

Keicy 喺K3 被甄選咗入 choir, 代表學校出賽, 仲有攞獎添!

希望升咗小學部嘅 Keicy, 有機會繼續參加學校嘅合唱團啦! ^^

`

運用新科技 與家長溝通更緊密

現時通告係透過電腦或手機嘅 apps 嚟收, 利用科技慳返啲紙張, 同時亦都好尊重家長, 會問家長係咪願意將小朋友嘅相放上網. 另外亦會公開部分活動嘅帳目, 包括場地費用、車費等, 畀家長參考, 透明度高.

而學校嘅消息, 就會喺 Facebook page 同網站發布.

值得一讚嘅係, 學校嘅 fb 管理好好, 為咗保護私隱, 家長加入前要 inbox小朋友個名、班別同班號, admin approve 咗, 先可以瀏覽內容.

`

Good Hope Group oic.pic

good hope doll.pic

而 德望嘅家長教師會, 亦都舉辦好多活動, 邀請家長同老師一齊參與, 拉近家長同學校嘅距離, 實踐家校合作, 大家嘅感覺好親切, 好似一家人咁warm, 其中一個例子, 就係去年嘅 60 周年晚宴, 大家同心合力, 花咗唔少心機、時間同心血將場館佈置得美輪美奐.

可以為學校出一分力, 真係好榮幸同好開心呀!

good hope.pic

當晚最深印象係 Sister Pauline, 佢一聽倒音樂, 就即刻拖住大家隻手輕輕咁揈吓, 當時我同佢相認, 話我係校友嘅時候, 佢畀一個大力嘅擁抱我, 好溫柔咁同我講: ”welcome home!”

good hope paper stand.pic

`

柔情愛貓校長 宣揚愛心

所有 Hopers 都知道, Sister Pauline 好鍾意小動物, 尤其對貓隻, 充滿愛心.

Good Hope_57

依山而建嘅德望校園, 吸引唔少流浪貓聚集. 當 Sister Pauline 得悉學校附近嘅流浪貓好可憐, 加上校內多位師生都好鍾意貓之後, 就為貓隻絕育, 仲設立一間「貓室」, 畀貓隻容身.

現時學校一共收養咗 10 幾隻畀人遺棄嘅流浪貓. 呢班「貓老師」每日喺校園周圍「巡遊」, 令校園充滿生氣, 有時貓貓會坐喺圖書館睇書, 有時坐喺保安室, 有時企喺校門睇風景, 自由自在咁生活.

學校每年都會舉辦動物權益同愛護動物嘅講座, 從小教育學生點樣尊重、愛護動物.

另外, 學校更會邀請非牟利獸醫診所、群貓會等唔同機構同學生分享, 講授動物被棄養嘅慘況, 教導學生點樣做一個負責任嘅主人.

 

冇架子校長 挺身而出阻抄牌

Good Hope_52

講到親民, 德望幼稚園嘅吳嘉美校長, 有一次令我哋一班家長印象深刻.

六月尾, 有警察到學校前抄牌, 吳校長為免一眾家長因怕被抄牌手忙腳亂, 急於帶囝囡過馬路, 釀成危險, 主動上前同警察協商.

 

而令眾家長感動同難能可貴嘅係, 全校咁多學生, 吳校長都樂意花大量時間同各家長溝通, 察覺同知悉每位小朋友嘅優、缺點. 細囡 Kassy 同校長嘅接觸, 係個好例子.

年前帶 Kassy 去德望做入學面試嗰陣, 吳校長好快就發現佢有說話發展遲緩問題, 部分發音唔準, 即場同我講要花更多時間留意, 更建議儘快帶 Kassy 去睇醫生, 改善情況.

 

多 得校長之金石良言, Kassy 原本比較怕醜內向, 唔太鍾意講嘢, 到而家日日好開心咁講唔停, 性格亦都變得開朗, 我哋嘅家庭生活隨即變得更加和睦, 家人之間有更緊密、良好嘅互動, 真係要感謝吳校長嘅專業判斷、意見、同一直對 Keicy、Kassy 嘅關心!

 

感恩.祝福

Good Hope_51

兩個寶貝囡Keicy同 Kassy 能夠就讀自己嘅母校, 係緣份;能夠係一間咁高質素嘅學校讀書, 得到咁多幫助同照顧, 係福氣, 的確需要感恩!

祝德望學校嘅校長、Sisters 同全體師生身體健康! 事事順利!

`

FB: KeicyKK

 

 

 

 

發表於2016.9.05
留言(0)
博客名稱 :
Fiona
網誌名稱:
FionaKei's blog
使用天數:1,306
年齡:2
電郵:FionaKei@weshare.hk
按月份瀏覽
    2018
  • 一月
  • 二月
  • 三月
  • 四月
  • 五月
  • 六月
  • 七月
  • 八月
  • 九月
  • 十月
  • 十一月
    2017
  • 一月
  • 二月
  • 三月
  • 四月
  • 五月
  • 六月
  • 七月
  • 八月
  • 九月
  • 十月
  • 十一月
  • 十二月
>> 更多
系統分類
  • 飲食烹飪
  • 環球旅遊
  • 親子育兒
  • 數碼科技
  • 生活品味
  • 藝文創作
  • 電影戲劇
  • 其他
自行分類