28
07.2013

Xin 鮮 + Bene 班妮意大利餐廳 @ Sheraton Macao

我地今次join的「夢工場主題家庭套票」係咪好正呢?  但當大家睇埋今篇講喜來登金沙中心城酒店的美食篇, 一定更加流口水, 因為今次品嚐的2間餐廳都實在超有水準呀! 
 

 
Day 1的中午我地去了鲜 Xin吃火鍋自助餐~~ 如惠顧夢工場主題家庭套票2晚以上, 酒店都會送2大2小的午市自助餐劵架! 
  

 
店內樓底超高, 環境非常舒服; 當然要緊要係食物選擇多, 好味又抵食!! 
 

 
Matthew有高身又舒適的BB椅坐, 仲有成套BB餐具, 以及兒童蠟筆畫冊, 一來已不亦樂乎!
 

 
在公關熱情招待下, 大家先選點特色飲品, 媽媽要了紫紅莫都 (Sour Plum Mojito, $45), 由係酸梅子、薄荷加梳打水而成, 酸酸地好開胃架, 食buffet一流!!
  

 
嗜酒的老公要了笑意瀛瀛 (Sake Mojito), 又係一睇就知好清新!! 
  
 
 
之後來到戲玉, 依度最大的特色係自助任選個人火鍋套餐, 午市$198 / 晚市$358, 各包火鍋湯底、任選火鍋配料、醬料, 以及風味熱盤 (其實仲有豐富自助甜品!!), 好抵食架!
  
湯底選擇好多, 包括「魚羊」黃豆湯底、頂上清湯底、四川麻辣湯底、沙嗲湯底、沙參玉竹烏雞湯底、娘惹叻沙湯底及廣式粥底, 老公要了
四川麻辣湯底, 我就要烏雞湯底, 一濃一淡~~
  

 
睇下出面的任選火鍋配料啦, 有新鮮即切的優質牛肉、羊肉、豬肉卷, 質素好好架! 
 

 
海鮮迷見到依個豐盛的陣容, 一定好開心啦~~~ 我講緊我老公呀!!! 
  

  
選擇真係好多, 如果全部要食勻, 都真係會好飽下~~~
  

 
最開心聽到丸類係酒店餐廳自家製, 特別放心食用, 事實上好多款丸都真係好好食! 
 

 
吃火鍋難免感到熱氣, 這裡又有超清甜的蜜瓜、西瓜及哈蜜瓜任食, 我一來就吃了一大兜!! 
 

 
依度的醬汁都好多選擇 (相中只是一半...), 當中特別鍾意麵豉芥末醬, 微甜微辣滋味好特別! 
 
  
 
其實仲有好多款熱盤, 質素都唔差架, 特別係燒雞, Matthew係咁要求要食「肉肉」~~ 
  

 
 
依個燒味counter又係吸引到爆....  搞到我地忍不住散叫了西班牙黑豚肉厚切叉燒 ($168)~~~
 

 
依份叉燒真係太強了, 焦香的外層一點唔會過燶有苦味, 而是充滿蜜味, 肉質豐腴得來又無比鬆化, 再嗜甜些可以點上同上的蜜糖醬吃,  滋味非筆墨可以形容呢! 
  

 
另外, 公關又俾我地試埋了2份新加的夢工場特色點心套餐, 首先是5道菜的大師傅點心套餐 ($228/位), 打頭陣係米網鵝肝香芒卷, 成品香脆不油, 香芒又可以中和鵝肝的肥膩感, 很夾! 
   
 
然後有招牌黑松露水晶蝦餃, 晶瑩剔透的鮮爽蝦餃加上黑松露點綴, 梗係吸引啦! 
 

 
仲有邪惡但美味的紅燒扣肉包, 唯有少吃多滋味啦~~~ 
 
 
押尾仲有一份海鮮濃湯燴飯, 用料十足又加上脆米, 又係好吸引呢~~~  
 

 

 
甜品的流心芝士蛋糕伴咸味焦糖醬又係好得, 咸甜交錯的滋味十分豐富, 芝士蛋糕質感細滑, 又有香脆果仁襯托, 口感一流, 好味到咸味焦糖醬都一滴不漏全部食哂!! 
 

 
另一款是阿寶點心套餐 ($218/位), 又係5道菜, 首先係香煎鮑魚糯米飯, 好味呀! 


 
竹筍水晶蝦餃就冇試啦~~~
 

 
松子叉燒包簡單得來都幾好味架~~~ 
 
 
仲有依個瑤柱蛋白炒野米飯又係粒粒分明, 簡單清爽、健康又好味, 令媽媽好欣賞! 
 

 
最後的咸味焦糖雪糕又係極品, 些微的咸味能夠將焦糖的甜味發揮極致, 加上伴碟的香滑奶醬, 真係好味到暈丫~~~~ 
 

 
Matthew仔「甜品咁好味, 唔夠喉呀, 點算???」 
 

  
「咦, 唔係喎, 公關哥哥話出面仲有甜品buffet架, 媽媽妳快D拎俾我食啦~~」
(按: 今次招待我地的公關真係好鬼錫Matthew.... 多謝哂佢呀~~~~~)
  

 
「最多我俾個可愛的臉臉樣俾妳啦~~~~~」 
 

 
甜品的選擇雖然唔算好多, 但試了幾款都好有質素, 特別係檸檬批同香梨批, Matthew成件隊架!
 

 

 
好狼的為食Matthew仔!!!  
 

 
媽媽最後都飲了碗紅豆沙, 飽足離開~~~ 來到day 1晚餐, 我地就重訪了去年12月到訪過的Bene
  
 
去年我地係自費到訪食lunch時 (見舊blog), 我地就係坐依邊的園林位, 景觀超正呢!  
 

 
今次食晚餐, 就在室內圓桌位就坐, 氣氛情調都好一流架~~ 
  

 
由於下午玩+游水太盡興啦, 今餐好動Matthew沉沉睡了, 我地可以舒服嘆返餐啦!  
  

 
今餐用返媽媽的Nikon 1相啦, 先係由多款果汁mix起的welcome drink, 幾清新開胃架~~ 
  

  
麵包籃雖冇上回的豐富選擇, 但成品充滿蒜香又夠軟熟, 超好味!  雖要留肚, 仍忍不住吃了兩大件!
  

 
由於Bene主打地道家庭式意大利菜, 所以菜式份量好慷慨, 超豐富的班妮特色前菜就係例子! 
  

 
併盤中幾乎乜都有得食, 最適合貪心又花心的媽媽; 當中特別要讚燒牛脷好軟稔美味~~ 
 

 
依個蛋批都好香口美味架! 如果Matthew唔係訓左冇得試, 一定會好鍾意啫! 
 

 
蕃茄多士同煙肉露筍卷都清新美味, 作為開胃頭盤非常適合~~ 咁樣每款試少少, 真係好滿足! 
 
 
老公又點了一款士多啤梨味的Cocktail, 聽講都唔錯架, 不過媽媽就冇試了~~~
 

 
之後到每位餐湯, 份量又係好巨!! 先試牛肝菌忌廉湯, 非常濃馥郁~~~
 

 
反而較鍾意經典雜菜湯, 因為裡面真係超足料, 感覺好健康, 又有濃濃芝士味!! 
 

 

 
之後到最為期待的煙肉忌廉芝士意大利粉 (Carbonara)!!  意粉以大大個的Castelmagno芝士盛載上檯, 意粉的熱力會令芝士半融, 混合埋原已香濃美味的醬汁, 吸引到爆!! 
  

 
來一張老公的大機相..... 真係好香好濃超美味!! 見到大家咁忍口客氣, 媽媽忍不住全部KO哂~~ 
  

 
仲有巴馬火腿薄餅, 即焗的pizza香脆熱暖可口, 簡單得來卻美味~~ 
 

 
然後仲有葡酒果汁煮牛排, 牛肋骨肉質豐腴夠靚, 兼炆得超鬆化, 幾乎入口即融, 好正!! 
 

 
依味燒鱈魚件露筍蜆汁又係好正, 超滑的鱈魚在鮮美的蜆汁的襯托下, 鮮美不得了, 很適合孕媽媽胃口; 而且因口味較清淡關係, 剛醒來的Matthew都可以食埋一份~~~ 
 

 
不過依隻好動豬仔, 下午在房間同泳池實在玩得太high啦, 夜晚都係邊食邊訓咋~~ 
 

 
甜品環節只有兩款, 不過水準都好高, 先是希臘酸奶伴馬斯卡彭芝士及雜莓果醬, 可知媽媽同Matthew都係Yogurt同Cheese的忠心粉絲, 今次仲加上清新的雜莓, 梗係鍾意啦~~ 
 

 
最後仲有班妮巨人新地, 由三大球自家製香滑雪糕 (好好味, 特別鍾意佢的朱古力!!), 加上大量brownie、棉花糖、雜莓、糖果而成, 好豐富繽紛; 由於老公唔多食, 媽媽差不多成杯KO! 
 

 
食到尾段, Matthew豬終於醒過來, 夠唔夠飽呢? 唔怕, 我地仲有甜品宵夜下場架, kakaka 
  

  
聽日就係最後一篇遊記, 不過亦係最多Matthew豬靚相的一篇, 各位粉絲要留意喇~~ 
發表於2013.7.28
留言(11)
  • Oli
    我覺得Carbonara最最最吸引
    28/07/2013
  • Ophelia
    Carbonara 同甜品最最最最最最最吸引 e家1221nn睇到e篇文...我個肚又餓了 我要自費試下
    29/07/2013
  • 妹豬
    個Carbonara睇到我流晒口水
    29/07/2013
  • 田鼠b
    matthew仔瞓喺車度果張超似爸爸呀! 唔知點解, 我見到啲荷蘭豆就流口水...
    29/07/2013
  • J · 傑夫
    煙肉忌廉芝士意大利粉 呢個上碟的方法太不得了! 我要去試!
    29/07/2013
  • y.timemini
    見到都正啊
    29/07/2013
  • Elaine.項項
    見到個Carbonara就顛佐
    29/07/2013
  • Mrs. Wu
    成個芝士比你地,定係會再用過架?
    30/07/2013
  • 小東
    晚餐好吸引呀!
    30/07/2013
  • Emily
    早D見到您介紹Bene就去試喇~ 尢其係Carbonara & 班妮巨人新地都好吸引~
    30/07/2013
  • jj
    個carbonara嘅即場撈芝士treatment........效果唔會比點火輸蝕~~~
    31/07/2013
博客名稱 :
甜魔媽媽Yan
網誌名稱:
甜魔媽媽小天地
使用天數:1,855
性別:
按月份瀏覽
    2018
  • 一月
  • 二月
  • 三月
  • 四月
  • 五月
  • 六月
  • 七月
  • 八月
  • 九月
  • 十月
  • 十一月
  • 十二月
    2017
  • 一月
  • 二月
  • 三月
  • 四月
  • 五月
  • 六月
  • 七月
  • 八月
  • 九月
  • 十月
  • 十一月
  • 十二月
>> 更多
系統分類
  • 美容時尚
  • 飲食烹飪
  • 環球旅遊
  • 親子育兒
  • 數碼科技
  • 生活品味
  • 藝文創作
  • 電影戲劇
  • 戀愛心情
  • 文化政經
  • 其他
  • 財經生活
  • 台灣館
自行分類
最新留言