19
04.2017

海洋公園「親親動物月」2017

親子育兒(學習)  

想睇動物,梗係去動物園啦!但係香港有動物園咩?晴朗都問過我呢個問題。其實海洋公園都有好多動物睇㗎!每個人去海洋公園,可能都有唔同嘅目的同期望。而我哋今次入去只有一個目的,就係要在有限嘅時間內睇盡各種動物呀!
在晴朗的一天向海洋公園出發!gogogo~


晴朗到達正門嘅時候,心情已經興奮不已!有得玩梗開心啦!


我哋即將要接受動物「碼」拉松挑戰,are you READY??


玩法係要到唔同嘅展館集齊動物星章,事不延遲,要把握時間開始喇!

第一站:海洋奇觀


呢個展館有4個星章,分別係珊湖、綠海龜、鎚頭鯊同埋黃海馬。快啲展開搜索行動囉!


QR Code呀!搵到喇!快啲開番海洋公園手機apps裡面嘅「動物圖鑑」scan一scan佢啦!原來王海馬係一夫一妻制,配偶離世後先會再搵新伴侶,都好長情喎!*o*


在挑戰過程中,不忘認識一下唔同嘅魚類。小朋友嘅「十萬個為什麼」又開始啟動喇!


又有QR Code!快啲攞手機嚟啦!晴朗每次都超緊張!XD


睇咗好多唔同嘅海洋魚類,臨走仲要shopping一番添!Window shopping已經好開心喇!XD


又見到小紅熊!上次嚟都合照過,好有緣!晴朗又摸又攬,好鍾意佢呀!^^

第二站:香港賽馬會四川奇珍館


呢個展館有兩個星章,分別係川金絲猴同埋大熊貓。又要展開搜索行動喇!見到馬騮呀!仲一睹佢食嘢個胃食樣添!但係大熊貓呢?原來喱埋咗瞓覺,見唔到佢有啲可惜添!


出到嚟竟然遇到樂樂...大公仔!唔緊要啦!同佢影相一樣咁開心!原來大熊貓每日要食相等於人類進食20碗飯或20個漢堡包嘅食物,食量好驚人呀!@.@


路過見到護理員介紹梗鸚鵡阿Vet,佢好似聽得明人類講咩嘢咁,又飛畀我哋睇,好犀利呀!


最後,仲可以同佢合照添!Hello! Vet! 我係晴晴呀!^^

第三站:鱷魚潭


晴晴話條鱷魚係真,朗朗就話係假,在爭論期間,見到鱷魚隻腳識郁,謎底終於解開喇!跟住仲同假嘅鱷魚合照添!臨走要記得scan埋QR Code喎!今次係認識揚子鱷,原來佢哋嘅性別同孵化時候嘅溫度有關,28-31.5度較易孵出女仔,而超過33度嘅話,男仔嘅機會就較大。唔講真係唔呢!

第四站:自然大揭秘


一路向「自然大揭秘」進發,沿途見到幾隻行走中嘅龜龜~


小橋流水,好有大自然風味呀!


究竟繼續向上行會有咩發現呢?晴朗都好有冒險精神啊!


原來去到盡頭係瀑布嘅頂部,我記得以前晴朗婆婆都同我嚟過,而家就到我帶你哋嚟,感覺好特別呢!


終於搵到新嘅QR Code,今次教我哋認識靛冠噪鶥,呢種鳥類鍾意食果實、種子同埋昆蟲㗎!


養開金魚嘅我哋,當然唔會錯過「金魚寶殿」啦!


好多唔同品種嘅金魚呀!晴晴見到眼睛有大泡泡嘅金魚都咔咔大笑起來!個泡泡隨水流飄動,對於小朋友嚟講又真係幾好笑嘅!大開眼界!晴朗對於金魚嘅種類已經唔只局限於家中嘅蘭壽金魚喇!


又見到龜龜,今次係游梗水嘅!原來龜唔只識得響陸地行,仲識游水添呀!晴朗又長知識喇!^^


咁啱路經睇咗一陣「狂舞竹動」,佢哋表演得好合拍,技術仲超驚人添!睇到晴朗「嘩嘩」聲!不過此乃經過長時間訓練之動作,家庭觀眾切勿模仿~ XD

第五站:南極奇觀


呀!~~~ 唔好咬我呀!


響呢度見識咗好多唔同品種嘅企鵝,仲scan咗國王企鵝個code添!原來國王企鵝每次只會生一隻蛋㗎咋!

第六站:北極之旅


海獅、海豹都好親切,游得好近呀!響呢度認識咗斑海豹,佢哋好鍾意響岸邊或冰塊上成群聚集㗎!Do~ 已經儲咗10個星章喇!繼續努力先~

第七站:熱帶雨林探險徑


嘩!第一次咁近距離見到大嘴鳥咋!勁興奮!聯想起一隻朱古力牌子添!XD 原來佢個名叫做「托哥巨嘴鳥」,係世上最大嘅巨嘴鳥嚟!我哋行到去邊度,佢又跟住跳到去邊度,好似同我哋玩梗咁!好聰明!好鍾意佢呀!


玩咩玩得咁開心?原來係向人射水,啲人個身都濕晒喇!wakakaa~~~


繼續在展館參觀,睇到好多平時十分少見嘅動物。好似蛇、食人䱽呢類危險動物,雖然隔住塊玻璃,但都有啲心驚驚呀!


嘩!象魚原來係咁大條㗎!


中場休息!食少少嘢,抖一陣,就要繼續我哋嘅「碼」拉松挑戰喇!

第八站:大平洋海岸


我哋嚟呢度要搜尋加州海獅呀!


原來雌性加海獅有時候會收養被遺棄嘅幼海獅,好有愛心呢!*o*


風景好靚!實不相瞞,晴朗媽媽響南區長大,所以對呢區特別有親切感~^^

第九站:海洋劇場


食住薯條、洋蔥圈,飲住汽水咁睇劇場真係爽爆呀!


首先出場嘅係海獅同海豹~


跟住就輪到海豚出場,佢哋做咗好多花式跳水表演,好叻呀!


最後仲識得用尾巴同我哋拜拜添!So cute~ 原來印度太平洋樽鼻海豚有時會同過百隻同伴一齊暢泳,或者仲會同其他品種嘅鯨豚一齊游添呀!而印度太平洋駝背豚通常在春天及初夏期間出生。對海豚又認識多咗喇!^^V


唔知點解晴朗每次去到主題公園,都好鍾意整番個銅幣留為紀念~ hahaa~


我哋整咗一個水母同一個纜車嘅銅幣,好玩又滿足呀!

第十站:中華鱘館長江足跡


呢度有成3個星章,正呀!快啲入去囉!~


原來中華鱘全身都冇鱗片㗎!大個咗之後仲會游超過3000公里番去自己出生嘅長江水域產卵添!超強嘅毅力呀!

第十一站:尋鯊探秘


我哋即將被鯊魚吞噬喇!Help!!!


唔好咬我呀!呀~~~ (交足戲,唔該晒!XD)


館內設有互動遊戲,揮一揮手就可以幫鯊魚捕捉食物喇!


原來錐齒鯊係以肝臟中嘅大量油份嚟防止身體下沈,佢哋仲會吞空氣,留響肚內增加浮力~


呢部幫鯊魚照XRAY嘅機器好好玩,可以睇清楚鯊魚嘅內臟同埋骨骼呀!


我哋都好鍾意魔鬼魚,可能被《海底奇兵》卡通影響啦!覺得佢好溫和善良,而且泳姿仲好優美添!^^

第十二站:水母萬花筒


水母原來比恐龍更早出現,佢哋響地球上已經活超過6.5億年喇!好耐歷史!真係老過你同我~


日落西下,係時候要過番去對面山喇!今次係我哋一家人第二次搭登山纜車,晴朗依然係咁興奮雀躍~


深水灣一帶景色怡人,好舒服喔~


到站之後,又嚟到一條充滿懷舊氣色嘅古街。晴晴開檔幫人補鞋,埋嚟幫襯下喇喂!


有免費人力車坐,仲包埋免費車夫添!起行囉!~ XD

第十三站:澳洲歷奇


次次嚟到,樹熊都瞓咗覺。今次終於見到佢活動喇 !雖然叫做「樹熊」,但原來佢唔係熊,係屬於袋類動物,有個育兒袋載住樹熊bb,就好似袋鼠咁呀!


一嘗交通指揮,做個小小指揮員!後面有好大部電車,住對面海嘅我哋,甚少有機會搭電車,所以晴朗二話不說已經上咗去喇!


「叮叮」!原來電車係會發出叮叮聲響㗎!不停踩個掣,好好玩呢!^^'''


唔覺唔覺!我哋已經儲齊20個星章,大滿足呀!


可以登記幸運大抽獎,有機會嬴取「企鵝全接觸」家庭套票(名額:5個),或者海洋公園入場門票買一送一優惠(名額:2000個)㗎!Good Luck!!!


一於玩番轉「環迴水世界」賀一賀佢囉!^o^


由朝玩到晚,天已經黑晒!又到醫肚嘅時間喇!


響咁懷舊嘅古老街道,梗係食番啲港式食物先襯得起!再加個人形燒餅做獎勵啦!


最後,欣賞埋夢幻水都嘅噴水池效果就番屋企喇!今日玩得勁開心呀!

今日不但成功挑戰動物「碼」拉松,仲了解多咗唔同動物嘅有趣知識添!活動十分豐富精彩!雖然行到好攰,但都玩得好開心呀!海洋公園新推出嘅「親親動物月」,除咗有動物「碼」拉松玩之外,仲可以近距離認識來至海、陸、空嘅動物大使。專業動物護理員會響新加嘅「動物明星粉絲會」活動中,在不同地點同大家分享照顧動物嘅故事同埋相處點滴。當中包括有北極狐、海豚、小爪水獺、企鵝同鯊魚等,而金剛鸚鵡、貓頭鷹、犀鳥同埋二趾樹懶仲會走出展館同大家見面添!大家如果想同動物進行更加近距離接觸,不仿考慮參與期間限定嘅「與動物親上加親」活動,可以約會海獅、海豚、大熊貓、企鵝同埋海豹,而家做梗二人同行,一人半價優惠呀!有興趣嘅朋友就要把握時機喇!快啲帶埋小朋友嚟到海洋公園,同動物嚟一個難忘嘅約會啦!


海洋公園「親親動物月」2017

活動日期:2017年4月14日 ~ 2017年5月14日
有關「動物明星粉絲會」詳細活動時間表及「與動物親上加親」活動及報名詳情可瀏覽海洋公園網址:https://www.oceanpark.com.hk/tc/park-experience/animal-discovery-fest-2017?ref=hp-main


FIND US on:
     

BLOGs:

CONTACT US:

發表於2017.4.19
留言(0)
博客名稱 :
晴朗媽媽
網誌名稱:
晴朗天 - 食·玩·育·美·愛の親子平台
使用天數:457
年齡:1
電郵:chinglongtin@gmail.com
按月份瀏覽
    2017
  • 一月
  • 二月
  • 三月
  • 四月
  • 五月
  • 六月
  • 七月
  • 八月
    2016
  • 一月
  • 二月
  • 三月
  • 四月
  • 五月
  • 六月
  • 七月
  • 八月
  • 九月
  • 十月
  • 十一月
  • 十二月
>> 更多
系統分類
  • 美容時尚
  • 飲食烹飪
  • 環球旅遊
  • 親子育兒
  • 生活品味
  • 電影戲劇
  • 攝影寫真
  • 其他