04
04.2016

【親子好去處】西貢 白水碗 清新地有機悠閒莊園 Nature's Harvest Organic Farm and Leisure Getaway

飲食烹飪   親子育兒(旅遊)   攝影寫真  

今日係清明節, 同埋一班識咗多年既老友嚟親親大自然

 

因為想搵個農場去得嚟又唔想去錦田上水! 所以我今次就搵咗個新地方 - 清新地 Nature;s Harvest 有機悠閒莊園

 

 

 

 

只係喺科大門口迴旋處小巴站, 沿山路樓梯直落到尾!

 

(企喺小巴站影的角度)

 

(就係呢個小巴站喇)

 

(行去前邊就會見到有指示牌)

 

 

(就係呢條樓梯向下一直落)

 

(唔好以為行幾分鐘就到, 其實好很長!)

 

(沿途都有好靚靚既風景)

 

(見到呢個位置只不過行咗三分一)

 

(終點在望)

 

(見到隔離呢幾間小木屋, 呢度就係清新地啦!)

 

(喺門口已經有職員接待我哋, 因為呢度係每個鐘頭開始一個時段)

 

 

等我先影吓場地環境! 好大(當然唔夠新界大)

 

左邊一排小木屋供工作坊之用, 右邊係農田, 大草地同遊樂設施

 

 

佢每個時段都會有人數限制, 盡量控制唔會逼爆, 俾大家都可以好自在好舒服咁享受

 

 

 

 

仲有個景點位置, 紅色大風車! 

 

 

呢個係我哋今次Join個Package, 每位$160(大小同價) 

包括:導賞+盆栽製作+鬆餅High Tea+自製冷麵

 

當然可以隨你喜歡選擇自己想要的活動組合

 

呢度職員全部都好Nice好有禮貌同好願意幫助人! 記得起初係先係透過fb inbox同負責人傾, 之後在whatsapp繼續傾! 因為我都頗多問題問, 希望可以安排好D, 等自己一班老友都玩得開心!

 

但係負責人都冇嚴我煩! 所以真係好多謝佢既耐性

 

其實嚟清新地仲有一個途徑, 大家可以喺西貢白沙灣碼頭上船, 我叫佢做卜卜艇! 單程票價$30(大小同價) 不過要預先同負責人講, 佢會幫你安排埋! 時間大約10-15分鐘就可到達清新地, 你可以選擇搭一程或者來回都得!

 

至於時段就隨你鍾意想幾點嚟都得, 我呢個package差唔多兩個鐘內就會完成, 之後可以繼續留低玩, 玩到佢打烊!

 

 

另外呢度都有羊同兔仔, 可以買草餵佢哋, 但係佢哋就孤單D, 各得一隻! 如果你下晝先嚟, 可能佢哋都食飽!

 

  

所以我哋今次冇餵羊羊, 只係同佢影張合照就算lu...

 

 

芊芊見到兔仔好興奮, 一路要企喺個籠側邊望住佢! 自己一行近又要驚又要望

 

 

 

好鍾意佢呢度D指示牌既設計! 做得好靚! 自己都想造番塊放喺屋企

 

 

職員首先安排咗我哋一張枱坐低, 大家抖番陣氣就開始去另一間小木屋去做鬆餅

 

大家既行裝都可以放番喺張枱度, 貴重物品跟身就可以了!

 

 

我哋每個兩個小朋友一組, 職員先俾個大膠箱我哋, 分派發粉, 牛油, 糖, 牛奶同提子乾等!

 

 

 

 

 

 

 

 

 

 

我哋一組可以大概做到三至四個鬆餅

 

媽咪專登有D做到唔同形狀

 

 

初形出咗嚟啦, 準備拎入去個焗爐度焗囉!

 

 

可憐的哥哥失焦變咗鬆郁矇! 無錯, 我承認我係主力影妹妹!

 

 

鬆餅就係咗焗爐喇, 我哋洗乾淨對手就開始去做小盆栽啦

 

今次整既係小薄荷葉, 泥土同水都準備好, 小朋友只要拎起交剪去剪一小棵上嚟就OK

 

 

姐姐叫小朋友可以拎上手聞一聞!

 

 

哥哥剪係要媽咪陪住, 相反芊芊剪我哋就好放心, 大家知點解啦....

 

 

 

同小小薄荷葉影番張相先!

 

 

 

每個小朋友都拎住個盆去裝泥土, 然後將小薄荷葉插進泥土

 

 

 

 

 

種完個小盆栽之後我哋就番去睇我哋新鮮出爐既鬆餅lu!

 

嘩好香好靚呀, 點解咁易整我仲要出街買嚟食.....

 

 

我哋拎到番去先放番自己張枱, 然後職員集合我哋去農田嗰邊進行導賞啦

 

突然之間熱起上嚟, 天文台又一次失準! 明明尋晚睇APP仲話今日冇太陽同埋會落雨

 

但係我都望佢唔準既, 如果落雨就仲煩!

 

 

 

 

 

但係真係好曬, 攪到芊芊都冇咩耐性聽落去, 始終佢太細個都明白職員講解

 

佢只想快D去玩瀡滑梯, 所以我就早少少同佢行開去遊樂設施嗰邊玩一陣

 

 

 

 

但係意外嚟啦, 我拎住相機幫芊芊影相, 芊芊自己慢慢爬上去, 點知係樓梯上面有條橫樑, 佢未爬到上去就企起身個頭就撞落去, 之後佢成個人向後倒碌咗落樓梯

 

哎吔!!! 真係太危險! 其實我都唔係好明點解會有條橫樑喺度! 

 

佢好叻, 只係喊咗一陣就停咗, 同佢洗個面抖一陣, 就再嚟過!

 

 

導賞完咗之後我哋就番埋位食自己親手整既鬆餅, 因為大家都有D肚餓啦!

 

 

原來食落都唔差喎, 好好食! 外面焗得少少鬆脆, 裡面唔會太乾! 佢哋兩隻嘢每人都食咗兩件!

 

 

我哋除咗食自製既鬆餅, 我哋每個家庭都帶咗D水果, 菠蘿膠, 零食, 紙包飲品嚟一齊分享

 

呢度都有飲品賣, 話俾你知一罐汽水$10做個標準!

 

之後我哋出到外面打吓羽毛球, 雖然外面真係超熱, 但係小朋友有得玩就乜都唔驚!

 

 

喺遊樂設施嗰邊有條樓梯石級行落去就係洗手間, 洗手間比我想像中乾淨唔臭!

 

 

番到嚟最後一個付費活動, 就係整冷麵啦! 當然麵團都係呢度一早就搓好, 小朋友只係幫忙搓兩下, 跟住攪機厭扁佢, 之後搽上粉再落機相反方向攪出麵條

 

 

 

 

 

然後就交俾職員哥哥將麵放入水煮熟佢! 跟住再放佢入冰水度過冷河

 

 

 

就可以去另一個姐姐度加餸, 佢會幫你落芝蔴醬, 然後會叫小朋友自己夾蟹柳, 跟住佢再幫你打隻溫泉蛋落烏冬度! 你可以自行選擇要熟蛋, 佢會預備咗少量既熟蛋俾有需要既小朋友, 再落少少芝蔴碎就大功告成啦........哥哥去開餐先

 

 

 

 

 

 

 

 

 

上晝既自費活動終於結束啦! 整鬆餅, 種盆栽, 整冷麵都好開心! 唔會話好趕好趕咁

 

自在地中午在室內享用所有自製及帶來的食物! 跟住呢班小怪獸梗係開始要出動啦

 

呢度有好多唔同既設施俾佢哋放電!

 

 

 

 

 

 

 

 

 

 

 

玩吓玩吓見到遠處仲有一個地方, 唔知係咩嚟....原來都係屬於清新地的範圍

 

聽講係佢哋全新開放既地方, 上年都未有! 呢度都係設有兩間小屋同埋一些兒童玩樂設施, 更適合年紀較細既小朋友

 

 

 

 

不過佢哋停留咗冇幾耐, 最後都係番嚟呢邊玩! 可能嗰邊真係唔夠刺激卦

 

 

 

但係估都估唔到最後班馬騮原來最鍾意係留喺度玩沙!

 

哥哥仲玩出咗一幅好有藝術成分既人臉沙畫! 太利害了吧~ ~

 

 

 

最後我哋差不多玩到3:00點就執嘢離開啦, 大家都可以早D番去休息, 始終第二朝係工作天同小朋友番學! 短短四個鐘大家都覺得玩得好開心! 同埋臨走前梗係要影番張大合照啦

 

 

 

 

最可怕既事來了....就係要沿路行番石級上山離開! (足足行咗接近25分鐘)

 

Photo by CANON 5D Mark III, Len | EF 24-70mm f2.8L USM

 

呀劍評分: 9分

 

呀劍評語: 巿區中既綠洲! 近近地搭小巴都去得到既農場, 有咩唔方便唔夠飽, 隨時上番去科大食High Tea都仲得, 而且價錢唔貴! 物超所值


清新地 簡介

清新地隱匿在蜿蜒山路盡頭的白水碗,“山重水復疑無路,柳暗花明又一村”,這麼一個瑰麗寶地,是為有緣人保留的。大家只要來到清新地就可以走進大自然,認識有機耕種。參觀莊園內的有機種植區, 由資深農夫分享有機種植的經驗和自然生態,籍此提升愛護環境和環保意識。 都市莊稼漢為租地自耕計劃, 有導師教授有機耕種技巧,適合喜歡嘗試有機耕種的你。清新地也提供多項主題性的活動和工作坊,例如小豆芽創作坊,利用沙石和種子創作圖畫, 用玩出來的創意換取最快樂的學習。我們相約在清新地,投向自然,享受這份心田甘露。


地址

清新地 -西貢白水碗D.D.227 (科技大學旁)

 

營業時間

Mon-Sun: 9:00 am - 5:00 pm


聯絡電話

2723 3126 / 5112 9195


網址

www.naturesharvest.com.hk/

https://www.facebook.com/naturesharvest

 

(以上資料更新至文章當日)

 

 

Facebook專頁: 呀劍萬帥 kimfamilytraveltips

 

Blog網誌 : kimfamilytravel.blogspot.hk

發表於2016.4.04
留言(0)
博客名稱 :
呀劍萬帥
網誌名稱:
呀劍萬帥 • 親子旅遊 • 攝影札記
使用天數:530
年齡:1
電郵:kimfamilytravel@yahoo.com.hk
按月份瀏覽
    2017
  • 一月
  • 二月
  • 三月
  • 四月
  • 五月
  • 六月
  • 七月
  • 八月
  • 九月
    2016
  • 一月
  • 二月
  • 三月
  • 四月
  • 五月
  • 六月
  • 七月
  • 八月
  • 九月
  • 十月
  • 十一月
  • 十二月
>> 更多
系統分類
  • 飲食烹飪
  • 環球旅遊
  • 親子育兒
  • 數碼科技
  • 生活品味
  • 藝文創作
  • 電影戲劇
  • 寵物日誌
  • 攝影寫真
  • 戀愛心情
  • 文化政經
  • 其他
  • 台灣館
自行分類